COMEDIA

As nosas protagonistas levan anos e anos, séculos, tropezando unha e outra vez coas mesmas pedras, os mesmos erros. Uns erros causados na súa gran maioría polas leis creadas polos homes. A deusa Némesis, farta de contemplar esta inxustiza, decide enfeitizar ás mulleres para que se unan e tomen conciencia.

Lideradas por Praxágora, xuntas deberán roubar a roupa dos homes e coarse na asemblea para conseguir así cambiar as leis establecidas por outras máis xustas e igualitarias.

Pero só terán o tempo dunha noite para atravesar o gran bosque que leva ata o outeiro onde se celebra a asemblea ao despuntar o día. E a escuridade do camiño está chea de perigos e espellos nos que verán reflectidas as súas propias vidas. Enfrontándose a elas e aos seus medos, deberán resolver que leis son as que realmente farán que todo cambie por fin, dunha vez por todas e para sempre.

Estas asembleístas farannos reflexionar a golpe de risa sobre o noso papel na sociedade, obrigándonos a implicarnos e tomar partido queiramos ou non.